حكايات اتنين مخطوبين

من طرف تسبيح 06/10/09, 02:13 pm

الفصل الاول

مش عايز اتجوز فكل من تزوجوا يعانون من زوجاتهم
و انا مش ناقص وجع دماغ لما بابا سالنى ايه مواصفات البنت اللى بتحلم بيها قلتله اخلاق و دين و جمال و خفة دم و ما تخنقنيش و تكون هادية و تسمع الكلام و اللى اقوله يمشى (تاثر باغنية انا اللى اقوله اللى اقوله يمشى )

احمد
مش عايزة اتجوز مش عايزة واحد يعاملنى جارية عايز اللى يقوله يتنفذ لازم يبقى فى نقاش ) ده الرد اللى قولته لماما لما قالتلى انتى جوزك لازم تسمعى كلامه و متعندوهشندا

من طرف تسبيح 06/10/09, 02:24 pm

الفصل الثانى
لقاء

و انا ماشى النهارده فى الشارع شوفت بنت جميلة جدا بس طبعا ما كلمتهاش عرفت بالصدفة انها قريبة واحدة ساكنة معانا فى العمارة حكايات اتنين مخطوبين Clap

اول ما لقيتها فى العمارة ركبت معاها الاسنسير و طبعا وصلتها للدور اللى هى فيه الاول

احمد

و انا ماشية النهارده فى الشارع كان فى واد ماشى ورايا و فوجئت و بينى و بينكم اتخضيت لما لقيته طالع معايا فى الاسنسير ندى

لما دخلت الشقة اتغديت و لبست و نزلت عشان اقابل اصحابى فى النادى ياسبحان الله البت دى مظبطة مواعدها معايا و لا ايه انا و نازل لقيتها هى كمان تانى

احمد

ايه حكاية الواد ده بقى تانى مرة اشوفه بس المرة دى احلى من المرة اللى فاتت الطقم اللى لابسه المرة دى اشيك المهم انا فى طريقى دلوقتى للنادى اصحابى مستنينى هناك و عزمينى على الغدا

ندا

ياااه الواحد اخر شياكة دخلت النادى و لقيتى اصحابى و قعدت معهم وضحكنا ضحك على واحد صاحبى خاطب بقاله شهر و بيقول خطيبته بعد الخطوبة اتحولت حكايات اتنين مخطوبين Marsa138

مش دى اللى انا خطبته كلامه خوفنى اكتر من الخطوبة و قلت لاصحابى انا البنت اللى اخطبها لازم تكون رقيقة و هادية بس ايه اللى يضمنلى انها ما تتحولش حكايات اتنين مخطوبين Th

و مصيبة لتتحول بعد ما نتجوز مش بعد ما اخطبها الواحد محتار البنات دول مصايب

احمد

وصلت النادى و قابلت اصحابى و كانت واحدة بتشتكى من خطيبها انه مش رومانسى و انه حياته كلها جد و هزار مفيش رومانسية ابدا انا ما عجبنيش كلامها قالتلها اهم حاجة الاخلاق و خفة الدم

ندا

من طرف تسبيح 06/10/09, 02:29 pm

الفصل التالت
الشيطان بيشوف شغله

احنا و قاعدين فى النادى كان فى شلة بنات جمبنا هما مش جمبنا بالظبط هما فى وشنا للامانة يعنى المهم انهم كانوا عاملين يضحكوا و يتريقوا لما بصيت هى مش بصة قوى هى نص بصة عشان ربنا قالنا غضوا البصر لقيت البنت اللى كانت معايا فى الاسنسير لا البنت دى كده مستقصدنى بس استقصاد جميــــــــــــــــــــــــــــــــــــــــــل:cla p:
اول ما شفتها بحلقت حكايات اتنين مخطوبين Marsa138

و نسيت غض البصر و كل حاجة مش بقولكم البنات دول مصايب بيجيبوا الذنب للواحد اللذيذ بقى انها كمان بصتلى شكلها حست بى انا و ببحلق اول ما بصتلى وديت وشى الناحية التانية و لا كانى موجود

احمد

احنا و قاعدين انا و اصحابى كان فى شلة اولاد قاعدة و عاملين يحكوا و يتريقوا على واحد صاحبهم لسه خاطب اللذيذ ان احنا قعدنا ساكتين و بقينا نسمعهم بس باين عليهم عيال مصايب دمهم خفيف جدا انا و قاعدة حسيت ان فى حد منهم بيبصلى و يبحلق لما بصيت حكايات اتنين مخطوبين Marsa138

ده الواد بتاع الاسنسير لا الموضوع كده مش طبيعى الواد ده شكله بيراقبنى و لا ايه انا خايفة انا النهارده هاخلى واحدة من اصحابى تروحنى مع ان الواد وسيم و باين عليه مؤدب و .....و .........و ....... و.. بس و لو ايه اوعى الواد يغرك يا ندا اوعى اوعى

ندا

فات كام يوم و البنت ما بتجيش تزور قريبتها اللى فى العمارة يمكن بتيجى و انا ما باشوفهاش بس انا اديت 5 جنيه لعم حسن البواب اول ما يشوفها يرن عليا من موبايله حتى البوابين بقوا يجيبوا موبايلات روقان لا و 6600نوكيا رجل مواكب عصره بس انا مهتم بالبنت دى ليه اليومين دول حكايات اتنين مخطوبين Za--

اوعى يا احمد تكون بتحبها يا احمد اوعى لاحسن تدبس فى جوازة و تلاقيها بعد كده اتحولت انا مش عارف بقى ايه اللى حصلى البت دى باين عمله لى عمل لا ايه بس البنت رقيقة و جميلة و قمورة جدا و دمها خفيف ده كفاية لما تتريق على اصحابها فوق يا احمد مش بقولك عامله عمل و باين على الجن مصور بن جنية و شايف شغله بس و لو مش هنخدع و اخطبها و بعدين القيها اتحولت ما كلهم بيقولوا كده فى الاول و بيطلعوا فى الاخر كدابين(تاثر بعمرو دياب)

احمد

ما بقتش اروح لبنت خالتى العمارة عشان ما اشوفش الواد ده تانى لاحسن باين الشيطان شايف شغله اليومين دول جامد حكايات اتنين مخطوبين Icon_evil

بس بنت خالتى قالتلى تعاليلى بكره يلا انا مش هاخاف من حتة واد زى ده مع انه وسيم و دمه خفيف قوى ابعد يا شيطان ابعد يا شيطان
ربنا يولع فى الشيطان اللى بيزن على ودنى هو و مراته و اخته و عاياله و قبيلته كلها

ندا

من طرف تسبيح 06/10/09, 02:46 pm

يلا يا جماعة عاوزة تشجيع عشان اكمل
على فكرة هى حكاية قديمة يعنى ممكن يكون فى حد قراها قبل كدا بس انا بحبها اوى
مستنية ردودكم

من طرف mona 06/10/09, 03:00 pm

كملي يا دوك

من طرف **smart doc** 06/10/09, 03:49 pm

السلام عليكم ورحمة الله...
قصه شكلها مشوقه أوي يا دوك والله..
بس هقول حاجه كدا يا رب بس متتديقيش منها .. هو لية كل حكايات الحب بحس أنها فيها حاجات حرام أو جايز مش واقعية أوي..يعني مثلا الصدفه ال جمعتهم الشيطان لعب فيها دا مجرد النظره حرااام .. أنا بجد قربت اتعقد لأ دنا اتعقدت خلاص نفسي أشوف 2 بيحبو بعض بس معملوش حاجه تغضب ربنا...هل كدا يبقي الحب حرام؟؟؟؟؟
عموما ولا يهمك دكتر أكيد القصه دي مش حقيقيه يعني... أنا ال معقده الدنيا...
كممممممملي يا دوك حكاية جميلة..اوعي تزعلي من كلامي أنا بفضفض معاكي بس هههههه
وتقبلي مروري..

من طرف تسبيح 06/10/09, 04:06 pm

بصى يا روزى

سؤالك حلو اوى
وطبعا طبعا ما زعلتش منه
مش عشان فى قصص حب ممكن يكون فيها حاجة حرام يبقى كل القصص حرام
على فكرة ممكن قصة الحب دى تنشأ بين اتنين مخطوبين
يعنى هو كان بالنسبة ليها انسان عادى واتقدم لها ووافقت عليه بعقلها وبعد كدا حبته من صفاته الحلوة اللى اكتشفتها فيه مع الوقت وانا شفت قصص حب كتير من النوع دا واصبحت من اقوى قصص الحب الناشئ فى الحلال
وبرده الاعجاب بشخص انا شايفه انه مش حرام ما دام ما صرحتش بهذا الحب او تمشى ورا الشيطان فى حاجة ممكن تغضب ربنا
هو دا رأى

من طرف **smart doc** 06/10/09, 04:15 pm

‏ ‏ """الحب الناشئ في الحلااال"""
الله عليكي يا دكتر جبتي المفيد عندك حق فعلا الحب دا هو الصح جزاكي الله خيرا علي توضيحك الجمييييل دا...

من طرف تسبيح 06/10/09, 04:42 pm

الفصل الرابع
مؤامرة احمد و عم حسن البواب

ياااااااااااااه الجو حر جدا اما ادخل اخد shower المياه تروى العطشان و تطفى نار الحران و تنضف الجربان و تروش القرفان و تريح الزهقان هكذا كنت اغنى و انا فى الحمام
ياااه الواحد فاق و انتعش اما احلق دقنى و احط لشعرى جيل يا سلام عليك يا واد يا احمد قمور من يومك ايه العسل ده يا ناس سكر يا اخواتى بس يا رب النمل ما يتلمش عليا
اما البس طقم حلو و اخش ازاكر عشان اسلم المشروع بتاعى اللى مش عايز يكمل

احمد

الجو حر اليومين دول اما ادخل اخد دش عشان البس و اروح لمنى بنت خالتى يا سلام على الميه و حلوتها هى و ساقعة يا طعمتها هكذا كنت اغنى و انا فى الحمام
خرجت من الحمام و رحت على التليفون اطلب بنت خالتى منى عشان اقولها ان انا رايحالها
ندا:سلام عليكم
صوت خشن و عليكم السلام
ازيك يا محمد انا منى
ازيك يا منى عامله ايه عاش من شافاك
منى: لا اطمن هتعيش مش هتموت انا جايلكم كمان شوية
محمد:تنورى
منى:ده نورك خلاص قول لمنى بقى ان انا جاية عشان تفرش الارض رمل
محمد:ورد و حياتك
منى:كل مرة تقولوا كده و فى الاخر ما بتعملوش حاجة يلا سلام عشان الحق البس
محمد:سلام و سلميلى على اللى عندك

ندا

رن رن رن رن و فرحنى دى النغمة اللى حطتها لعم حسن البواب بعد ما سيفت رقمه على الموبايل و بعد ما قالى انى هحوله رصيد بعد ما يكلمنى و طبعا وافقت و امرى لله بوابين استغلاليين و انا و بذاكر ما انا فى كلية هندسة يا جماعة فى اخر سنة هندسة عمارة اللى يحب يجيلى انا فى انتظاره قصدى اللى تحب انا فى انتظارها
المهم انى سمعت الرنة و ما بقتش مصدق حكايات اتنين مخطوبين Marsa138

شفت الرقم

ده عم حسن
احمد:الو عم حسن حبيبى
عم حسن:ايوة يا احمد بيه الانسة جاية من بعيد انا شايفها
احمد:عطلها يا عم حسن و ليك اجرتك
عم حسن:اقولها ايه يعنى
احمد:اسالها على اخبار منى و محمد
عم حسن:ماشى بس ما تتاخرش
احمد:ورا السكة
ياااااه الحمد لله انى كنت لابس طقم حلو اما الحق الاسنسير

احمد

قفلت السكة و لبست و نزلت علطول و ركبت التاكسى و نزلت قدام العمارة و انا داخلة العمارة لقيت البواب جاى يكلمنى
عم حسن:ازيك يا ست هانم
ندا(و انا مستغربة):الحمد لله
عم حسن:و اخبار الست منى ايه
ندا:الحمد لله
عم حسن : و اخبار استاذ محمد ايه ؟
ندابزهق:الحمد لله
عم حسن: و اخبار ابنهم مصطفى ايه
ندا(جابت اخارها و اتخنقت):قولى يا عم حسن
عم حسن:ايوة
ندا:انت بواب عمارتهم هم و لا انا
عم حسن :هم
ندا:هو استاذ محمد راح شغله النهارده و لا لا
عم حسن:راح الصبح و سلمت عليه
ندا:يعنى شفته
عم حسن:ايوة
ندا:و اخباره ايه
عم حسن :الحمد لله
ندا:امال بتسالنى عليهم دلوقتى ليه
عم حسن:باطمن عليهم ما هم بيطمنوا عليا ده انا حتى النهارده كنت تعبان و استاذ محمد ربنا يخليه جه يسال و يطمن عليا
ندا:لا الف سلامة و عرفت عندك ايه
عم حسن:لا لسه هاروح للدكتور بالليل
ندا:لا تروح و لا تتعب نفسك يا شيخ
عم حسن:ازاى بقى
ندا:اقولك انت تبطل غلاسة و سؤال على الناس و طالما انت عارف انهم كويسين بطل اسئلتك و روح اقعد جمب مراتك و لا اقولك روح ساعدها اهو تريحها و تريحنى سلام
عم حسن :سلام
يااااااه الاسنسير طلع ادعى عليك بايه و انت تعبان و فاضل عليك كحتين و تموت يالا ربنا يطول فى عمرك و تغلس على الناس كمان و كمان ربنا يكون فى عون السكان

ندا

قفلت السكة و جريت لبست الشبشب و فكرت فى اللى اقوله لعم حسن كحجة و الحمد لله لحقت الاسنسير قبل ما تطلع او ممكن تكون طلعت و الله لو كانت طلعت مش هحولك رصيد يا عم حسن و شيل انت بقى حساب المكالمة

احمد

و نزل الاسنسير و ووصل و اتفتح الباب و ندا و احمد شافوا بعض
اول ما فتحت باب الاسنسير لقيتها قدامى قلتلها سلام عليكم ردت بصوت جميـــــــــــل و عليكم السلام و بعدين حطيت ايدى على باب الاسنسير و كلمت عم احمد
جرى ايه يا عم حسن قافل الموبايل ليه يعنى اللى يعوزك يعمل ايه
عم حسن(فاهم ان دى لعبة):معلش يا استاذ احمد مش هتتكرر
احمد:عارف لو اتكررت هاقول لنادية انك مجوز عليها
بعد اذنك قالتلى كده عشان احاسب و اخليها تركب
احمد:اه معلش انا اسف اتفضلى انا كمان طالع
ابقى اطلع لماما يا عم حسن عشان عيزاك
عم حسن:طب استنى انا طالع معاكم
احمد(من جواه الله يخرب بيتك):لا الاسنسير ما بيشلش تلاتة
و قفلت الباب بسرعة و طلع الاسنسير

احمد

من طرف تسبيح 06/10/09, 04:48 pm

الفصل الخامس
و اتقبلنا

ركب احمد و ندا الاسنسير و طلعوا بيه للدور 11 السكة طويلة يا ترى قالوا ايه
احمد:ازيك
ندا(وشها فى الارض):الحمد لله
احمد:انتى طالعة لمين
ندا:لبنت خالتى منى
احمد:منى و محمد
ندا:انت تعرفهم
احمد:ده محمد ده صاحبى
ندا:هم اصحاب محمد كده
احمد( حكايات اتنين مخطوبين Marsa150

):كده ازاى يعنى
ندا:يعنى اشقياء و دمهم خفيف
احمد:ربنا يخليكى كنت عاوز اقول حاجة
ندا:خير
احمد:انا شوفتك انتى و صحباتك فى النادى بجد انتى عسولة
ندا(وشها جاب الوان الحياء بقى يا جماعة):شكرا
فرصة سعيدة
احمد( حكايات اتنين مخطوبين Marsa50

):انا اسعد
راحت ندا لمنى و نزل احمد شقته
ايه البنت دى ادب و اخلاق و تدين و لبس محترم و جمال و حياء و خفة دم ايه دى انا عايز اتجوز لا ماليش دعوة انا عايز اتجوز جوزونى دلوقتــــــــــــــــــــتى حكايات اتنين مخطوبين Engry1

احمد

ايه الواد المشكلة ده كلامه حلو قوى شكلى هاتدبس بس لو طلع من اللى فاكرين نفسهم سى السيد هبهدله حكايات اتنين مخطوبين Engry1

ندا

مرت الايام و احمد خلص امتحانته و اشتغل فى مكتب هندسى و بدا يكون نفسه
ندا خلصت امتحانات و طلعت بتقدير جيد
و فى الفترة اللى فاتت كانت مؤامرات احمد و عم حسن البواب مستمرة على ندا و هى حست بالموضوع ده

بعد تفكير و سهر اكتشف احمد انه بيحب ندا و مش هيقدر يستغنى عنها و قرر الارتباط بيها
ندا كانت بتفكر فى احمد و عرفت انها بتحبه

بعد حوار مع الاهل
اتقدم احمد عشان يخطب ندا
بعد تحريات اهل ندا واقفوا
دلوقتى خلاص بقت ندا خطيبة احمد
و ابتدت من هنا قصتنا بدات الخطوبة
الفصول الجاية فيها عياط و ضحك و دراما و مصايب
اللى عايز يعرف ايه اللى هيحصل يستنى
و انا عايزة ردودكم يا بنات على سؤال
ايه رأيكم فى سى السيد و حكمه و هتعملوا ايه لو اتخبطوا بعد الشر فى واحد كده؟
مستنية ردودكم

من طرف **smart doc** 06/10/09, 05:11 pm

هههه قصه جميله يا تسبيح
أما عمنا سي السيد دا؟؟أممم
هحاول معاة لو أنا مقتنعه بية وكان أخلاقه عالية أما لو كان متربس فهخلعه م الأول وأخلص نفسي..

من طرف dr.Broken Heart 16/10/09, 03:23 pm

المهم تكملى القصة يا دكتورة و نبقى نتكلم فى حكاية سى السيد دى بعيدن
القصة جميلة جدا بجد يا دكتورة و لازم تكمليها بسرعة

من طرف تسبيح 19/10/09, 02:00 pm

الفصل السادس
احكيلى و احكيلك
بعد زيارات احمد لندا فى البيت و كلامهم فى التليفون كتبوا الكتاب عشان لو عايزين يخرجوا يخرجوا براحتهم بس مش قوى لحد ما ندا تخلص كلية

اخيرا كتبت كتابى على ندا و هاخرج معاها و هاكلمها فى التليفون اتفقت مع مامتها و باباها انى هاخرج معاها النهارده نتغدى بره حكايات اتنين مخطوبين Clap

الواحد لازم يبقى شيك اول خروجة مع خطبتى لا دى بقت مراتى خلاص بقى و الله يا واد يا احمد و كبرت و خطبت و و كتبت كتابك بكره تجوز و تجيب بنين و بنات عسولين و عسولات طلعين لباباهم طبعا ياااااااه هابقى اب
بس يا ترى النهارده هنتكلم فى ايه حكايات اتنين مخطوبين Th

اول مرة هاكلمها و احكليها و تحكيلى و احنا قاعدين لوحدنا و اسالها ايه ده دى ممكن تسألنى سؤال محرج حكايات اتنين مخطوبين Yf--

يا ربى طب ساعتها هاعمل ايه
ايه ده اللى انا بفكر فيه ده هو انا بقيت عامل زى البنات كده ليه لو عايزة تسأل تسأل و لا يهمنى انا الراجل سى السيد يعنى يعنى فى الاول و الاخر كلامى هيتنفذ اه و لازم افهمها كده من الاول (مسكين ما يعرفش لما يقول اللى هيحصل له حكايات اتنين مخطوبين An--

)

احمد

الواحد محرج جدا اول مرة هاقعد و اتكلم مع ولد لوحدى لا ده مش ولد ده بقى جوزىيا ترى هيقولى ايه حكايات اتنين مخطوبين Th

يا ترى ممكن يطلع من اللى عايزين يقوله يتنفذ(مسكينة ما تعرفش)
طب هيسألنى عن ايه مش مهم المهم النهارده اكون قمر
و بعدين انا خايفة كده ليه لا يا ندا اثبتى ده لو كان سلفستر استولنى انا هوجن مهو كده ممكن يعيش فى دور سى السيد لا انا هافهمه من الاول و النهارده
عاجبه عاجبه مش عاجبه يلا خيره فى غيره بس ما ينفعش دلوقتى

ندا

لبس احمد اللى على الحبل و نزل مطقم و اخر شياكة
لبست ندا حتة طقم جامد ومحطتش مكياج كالعادة و قالت مقولتها المشهورة و اللى طبعا بتتمنى انها ما تحصلش
عاجبه عاجبه مش عاجبه خيره فى غيره بس ما ينفعش يلا توكلنا على الله

و راح احمد لندا
و اول ما خرجت و شافها حكايات اتنين مخطوبين Marsa138

ايه الجمال ده (من جواه طبعا)
و هى كمان(اش اش ايه الشياكة دى (برده من جواها طبعا)
و راحوا المطعم و طلبوا الغدا و اتكلموا

احمد:ازيك (للمرة الخامسة)
ندا:الحمد لله
احمد:ها عايزة تسألى اى سؤال
ندا:كتـــــــــــــــير
احمد: حكايات اتنين مخطوبين Icon_cheesygrin

يا حلاوة(بصوت واطى طبعا)
ندا:و انت
احمد:كتـــــــــــــــيــــــــــر
ندا: حكايات اتنين مخطوبين Icon_cheesygrin

يا طعامة(بصوت واطى طبعا)
الاتنين ضحكوا لان كل واحد سمع التانى
احمد:طب انا عندى اقتراح
ندا:عارفاه
احمد: بجد
ندا: اه
احمد:طب ايه هو
ندا:السؤال اللى تسأله انت كمان ترد عليه صح
احمد:صح
احمد:تعرفى انا بحب البنت الذكية اللى تفهم اللى عايز اقوله قبل ما اقوله
ندا:اطمن
احمد:طبعا مطمن مش انتى معايا
ندا(وشها احمر و جاب الوان):تعرف ان دى اول مرة اقعد و اتكلم مع ولد
احمد حكايات اتنين مخطوبين Icon_razz

:بجد
ندا:اه و الله انا اصلا ما كنتش باكلم ولاد فى ثانوى و لا فى كلية كلنا شلة بنات و بس
احمد:تعرفى ان انا فرحان جدا لانى اول واحد فى حياتك
ندا:طبعا لازم تفرح شكلك بتصاحب بنات و كنت حاسس ان ربنا هيوقعك فى واحدة بتكلم ولاد صح
احمد:بصراحة
ندا:اه بص عشان سيرة الصراحة انا اكتر ما اكره اللف و الدوران لازم من الاول نبتدى بصراحة
احمد:انا بدأت اقلق منك
ندا:ليه
احمد:يعنى اول خروجة لينا بتقولى انا ما بحبش و بحب
ندا:يعنى عايزنى اكدب عليك بص يا احمد انا عايزة ابقى زوجة و ام ناجحة باذن الله فعشان حياتنا تبقى كده لازم نكون متفقين من الاول
احمد:كلامك كله صح
ندا:اه ما ردتش على السؤال
احمد:افتكرتك نسيتى عموما فعلا زى ما قلتى و بصراحة باين عليك بتفهمى اللى قدامك بسرعة و دى حاجة عاجبنى قوى فيكى
ندا(وشها جاب الوان تانى و بعدين معاك كل مرة وسط الكلام تقول حاجة تخلينى اكسف)
احمد:ندا انتى عصبية
ندا:لا مش عصبية بس فى امور معينة باتعصب فيها اكيد يعنى انا بحب الاقناع و التفاهم يعنى لا قدر الله لو حصلت مشكلة بينا افضل نقعد و نشوف الموضوع مع بعض و انت عصبى
احمد:اه جدا
ندا:ايوة ايوة ايه كمان فرحنى
احمد :لا و الله حكايات اتنين مخطوبين Icon_razz

بس مع الناس اللى بحبهم اكيد ما ببقاش كده يعنى اطمنى
ندا(وشها خلاص كمان شوية اللون الاحمر هينطبع)
احمد:على فكرة شكلك حلو انتى و مكسوفة
ندا:كويس انك لاحظت يعنى قلل الموضوع ده شوية ما تكسفنيش كتير
احمد:و ايه اخبارك مع التشريح
ندا:فى الكلية بتحصل مهاذل مرة دخلنا اوضة التشريح و الدكتور بيشرح قدمنا لقينا 5 ولاد اغمى عليهم
احمد حكايات اتنين مخطوبين C_laugh

:و البنات
ندا:لا البنات 2 بس اصل البنات ما بقتش بنات قلبت رجالة ممكن تكون حصلتلهم حاجتين
1 يكونوا قلبوا رجالة
2 تكون اصبتهم لعنة
احمد: حكايات اتنين مخطوبين C_laugh

على رأيك
ندا:و انت اخبار شغلك ايه
احمد:الحمد لله
ندا:احمد انت حبيت قبل كده احكيلى بقى حبيت مين و بالتفاصيل
احمد:ياه خبر طب يا ستى احكيلك
لو عايزين تعرفوا قصص حب احمد تابعونى و على فكرة انا مش مسئولة عن رأى ندا فى البنات بتوع كلية طب و على فكرة دى اول مرة يخرجوا فيها و يقعدوا لوحدهم لان اهلها ما كنوش بيرضوا و هما مخطوبين انهم يقعدوا لوحدهم

من طرف dr.Broken Heart 20/10/09, 03:37 pm

دكتورة تسبيح
عودتى مرة أخرى بحكاياتك الجميلة و الرائعة
ياريت نشوفك على طول و نشوف كلماتك و مواضيعك الجميلة دى
ياريت تكملى القصة يا دكتورة
و شكرا" على الرأى الجميل اللى انتى خلعتى منه ده

من طرف Inflammatory Reaction 21/10/09, 06:04 pm

متابعين

من طرف SomeOne 22/10/09, 01:30 am

مشوقة اوي الحكاية دي ويا ريت تكمليها في اقرب فرصة

من طرف تسبيح 26/10/09, 04:40 pm

انا اسفة جدا على التأخير يا جماعه بس والله كان فى ظروف ما خلتنيش اقعد على النت خالص

وتعويضا انا هانزل 4 فصول ورا بعض

الفصل السابع
احمد كازانوفا

لما سألت ندا سؤالها الموعود احمد شرب شوية ميه عشان يعرف يرد عليها
احمد:بصى انا حبيت 3 مرات
ندا:3 مرات يا مفترى ليه يا بنى ده كله
احمد:انتى مش ملاحظة ان انا حبيب و لا ايه حكايات اتنين مخطوبين Aa--

ندا:لا ملاحظة بس بستعبط حكايات اتنين مخطوبين Mi--

احمد:لا لاحظى و خدى بالك كويس منى
ندا:يا سلام ده انت على كده ممكن تحب بعد ما نتجوز و تجبهالى و تعرفنى بيها
احمد:اخس عليك يعنى يرضيكى اعمل حاجة من وراكى مش لازم تبقى عارفة كل حاجة
ندا:يا سلام طب بص بقى عشان ما ابقاش انا كمان خبيت من وراك حاجة يعنى انا لو بقول لو حبيت بعد ما نتجوز
احمد:ايه ايه سمعينى تانى سمعينى تانى اصلى ما سمعتاش
ندا:لا الف سلامة على ودنك انا كنت بقول
احمد:ايه انتى صدقتى و هتعيدى الكلام تانى
ندا بتغيظ احمد:مش انت قولتلى سمعيبنى و بعدين انا قلت لو ماشى لو ثم انا ما كملتش كلامى
احمد:لا و النبى كملى كملى ما تكملى
ندا:هو انت مدينى فرصة اكمل يا احمد
احمد:يعنى انتى عايزة تكملى ده انا كنت قتلتك و قتلته
ندا:طب انا ماشى هو ليه بقى
احمد:يا سلام صعبان عليكى انى اقتله عايزة تضحى بنفسك عشانه
ندا:الله مش بحبه
احمد:طب بقولك بطلى و اقفلى الموضوع ده عشان ما
ندا:ما ايه
احمد:لا بلاش بقى
ندا:براحتك بس ما تتهربش يا استاذ و قولى التلات بنات اللى حبيتهم حبيتهم امتى و فين و ليه و عجبك فيهم ايه و عملت و عملوا ايه لما قلتلهم و خرجت معاهم قد ايه و كلمتهم كم مرة فى التليفون و
احمد:بس بس كفاية ارحمى بقى و اهدى شوية و بعدين انا ما كنتش اعرف انك بتحبينى و بتغيرى عليا للدرجة دى كان نفسى اصورك انتى و بتسألى شكلك كان فظيع
ندا:مين ده انا لا انا بس عايزة اعرف الحقيقة و مش عايزاك تخبى عليا حاجة عشان انا كمان لما اجى احكى
ما
احمد:استنى استنى هنا انتى مش قولتى ان انا اول واحد فى حياتك
تحكى بقى عن مين و لا هو كلام الليل مدهون بزبدة يطلع عليه النهار يسيح
ندا:مالك اهدى بس كده انا ما كنتش اعرف انك بتحبينى و بتغير عليا كده بجد كان نفسى اصورك انت و بتكلم من شوية شكلك كان فظيع
احمد:اه واحدة بواحدة يعنى بترديها
ندا:انا اخس عليك ما كنتش افتكرك تقول عليا كده
احمد:خلاص انا اسف
ندا:و لو اتحايل عليا شوية
احمد:بس كده طب انا اسف انا غلطان
ندا:خلاص خلاص تقبلنا اعتذارتكم
ندا:بس انت اتعصبت اهدا كده يا حبيبى و اعقل و ما تتعصبش فى امور زى كده
احمد:قولى كده تانى انتى قولتى ايه
ندا باستغراب :قلت اهدا و اعقل
احمد:لا كان فى كلمة فى النص بيتهيألى انى سمعت حبيبى قوليها كده تانى
ندا و اكتشفت اللى قالته من غير قصد:سلامة ودنك انت ودنك النهارده اكيد فى حاجة تهيأت
احمد:لا مش تهيأت طب و لو تهيأت قوليها تانى
ندا باستعباط:اقول ايه يا بنى
احمد:ابنك بقولك قولى حبيبى مش ابنك يا ماما
ندا:ايه حبيبى ده انت بتحلم
احمد:بحلم طب نورى النور و صحينى عشان الحلم يبقى حقيقة طب اقولك مش انا جوزك قدام ربنا و الناس
ندا:طبعا
احمد:طب خلاص قوليها بقى طب تعرفى اغنية حبيبى يا احمد بتاعة نجلاء فتحى بتاعة علمنى العوم و النبى يا احمد
ندا:اه عارفها ده انا بحب الفيلم ده
احمد:طب خلاص تعالى نمثله و تغنيلى الاغنية
ندا:ده على اساس ان انت محمود يا سين و انا نجلاء فتحى طب انا نجلاء فتحى ماشى لكن انت محمود ياسين طب ازاى
احمد:بقى كده انا زعلت خلاص
ندا:انت زعلت ده انا كنت بهزر يعنى معقول عمرو الشريف يمثل دور احمد ياسين
احمد:اهو كده

من طرف تسبيح 26/10/09, 04:41 pm

الفصل الثامن

ندا:انت صدقت انك شبه عمرو الشريف و لا ايه انت اخرك المنتصر بالله
احمد:ربنا يسامحك ده انا حتى لما كنت فى الكلية كنت عامل زى هارون الرشيد نت باقعد مع 5 بنات
ندا:بجد
احمد:انتى صدقتى يا ندا انا اصلا ما كنتش باكلم بنات كنت باتقى ربنا كنت بخاف انى لو كلمت بنت اخواتى البنات حد يروح يكلمهم
ندا:انت جميل قوى يا احمد من جواها طبعا
ندا:اهباحسب اصل لوكنت هارون الرشيد زى ما بتقول كنت هاندهالك الحراس بطرودك بره القصر
احمد:و اهون عليكى
ندا:اه دخلنا فى سكة اهون و ما اهونش
احمد:تعرفى ان انتى بتتهربى من الامور بسرعة
ندا:بص يا احمد انا و الحمد لله عندى قدرة انى اغير المواقف يعنى لو انا اللى غلطانة ممكن اخلى نفسى مظلومة
احمد:اه يعنى مش هاعرف اطلعك غلطانة ابدا
ندا:انت و شطارتك
احمد:طيب انا مش هاقول القصص غير لما تقولى يا احمديا زوجى يا حبيبى يا شمعة قلبى يا نور حياتى
ندا:ايه ايه حيلك اولا انا حياتى منورة منورة و بعدين ايه شمعة قلبى دى طب افرض الشمعة وقعت قلبى انا يتحرق
احمد:بقى كده طب انا هاتنازل مقابل كلمة واحدة
ندا:خلاص يا احمد يا زوجى
احمد:يا سلام و من قالك انى عايز الكلمة دى تحت امرك انا بقى انا عايزاك تقولى يا حبيبى
ندا:لا انسى دى مسألة مزاج و اهدا يا بنى و ما تزنش كتير
احمد:طب ممكن طلب
ندا:خير
احمد:ممكن ما تقوليش يا بنى تانى
ندا:بس كده حاضر يا بعلى
احمد:يا ريتك ما قولتيها دى ابنى احسن بكتير
ندا:عارف فى الافلام القديمة لما كانوا اتنين بيجوزوا و المأذون يجى يقول اتقبلينه بعلا لكى كنت باقول انا فى كتب كتابى لما المأذون يقولى كده هاقوله نعم اقبله بغلا لى
احمد:بغلا ربنا يكرمك و بعدين انتى مش بتقولى انتى بتوكلى والداك و الحمد لله ان كتب الكتاب عدا بسلام
ندا:طب احكى و ما تتهربش اكتر من كده
احمد:طب بصى المرة الاولى حبيت زميلتى كانت بتاخد معاى درس فى 2 و 3 ثانوى و لما دخلت الكلية نسيتهاو حبيت بنت كانت مؤدبة و اخلاق و كنت ناوى ارتبط بيها بس ملحقتش لانها اتخطبت و حكاية اقولهم دى غلط انا عمرى ما قولت لواحدة او عرفتها انى بحبها و طبعا ما كنتش باخرج معاهمو لا باكلمهم فى التليفون
ندا:طب دى الاولى و التانية التالتة بقى
احمد:التالتة دى كانت مؤدبة و عسولة و محترمة و دمها خفيف و قمورة و عمرى ما هاحب غيرها حبها بيجرى جوايا
ندا:و دى تبقى مين بقى و اجوزتنى ليه طالما انت بتحبها
احمد:التالتة دى تبقى انتى و اجوزتك لانى بحبك
ندا :طب يالا نمشى و وشها جاب الوان
احمد:انا اسف نسيت انك بتكسفى
ندا:خلاص مفيش حاجة بس انا عايزة اروح
احمد:انا اسف كمان مرة
خرجوا احمد و ندا من المطعم و فى العربية
احمد:انتى زعلتى يا ندا
ندا:مش مسألة زعلت الموقف ده المفروض عادى بين اتنين مجوزين
احمد:ما انا برضه باقول كده امال ايه
ندا:يعنى دى اول خروجة لوحدانا المفروض الكلام ما يبقاش كده كتير يعنى عشان انا اصلا كنت جاية متوترة فكلامك زاد توترى
احمد:اسف بجد
ندا:خلاص يا احمد ما تتأسفش انا كنت باضيع الموضوع و حكاية حبيبى و كده بالهزار بس يظهر ان لا مفر
احمد:فعلا لا مفر
ندا:يا سلام انت مش لسه قايل انك مش هتقول الكلام ده تانى على الاقل دلوقتى
احمد:ما اخبيش عليك بصراحة ما اضمنش نفسى لانى باكون معاكى عايزة اقولك اللى انا بحسه معاكى
ندا:يعنى مفيش فايدة
احمد:انا ممكن اقلل مش ابطل خلاص خلينا صريحين مع بعض كمان انتى كمان ساعات هتحتاجى لكلامى ده و بعدين انا ناوى اكلم عمى نقدم معاد جوازنا
ندا:ايه

من طرف تسبيح 26/10/09, 04:43 pm

الفصل التاسع

بعد ما قال احمد لندا انه عايز يقدم معاد جوازهم وندا قالت ايه متفاجئة قالوا شوية كلام تعالوا نشوفه
ندا:ايه
احمد:مالك يا ندا فى ايه
ندا:لا يا احمد مش هينفع
احمد:هو ايه اللى مش هينفع يا ندا انا مش هقدر استنى 3 سنين عقبال ما تخلصى
ندا:و ما قلتش كده ليه من الاول
احمد:كنت فاكر انى هاقدر
ندا:و ايه اللى جد(يعنى بقى جديد) و خالك مش قادر
احمد:يا ندا انا ما باقدرش اسيبك و لما باسيبك بنتكلم فى التليفون و لو يوم ما كلمتيكش ببقى هجنن انا حالى اتغير تفتكرى بالحالة دى هاقدر اقعد تلات سنين
ندا:احمد مش هينفع مش هاقدر ادرس و انا متجوزة هيبقى صعب عليا مش هاقدر اوفق بين احتياجات بيت و زوج و مذاكرة و لو جبنا بيبى الموضوع هيتعقد اكتر انسى يا احمد الموضوع ده ارجوك
احمد:انسى ايه يا ندا مش ده الموضوع اللى انساه دى حياتى يا ندا و وسط كلامهم رن موبايل ندا مش توقيت موبايلات خلاص مين الرخم اللى بيرن دلوقتى و على الخط
ندا:سلام عليكم
سها:و عليكم السلام يا ندا عاملة ايه
اخ غلطنا فى سها معلش احنا اسفين
ندا:الحمد لله
سها:انتى ايه مش بتكلمى ليه انتى مع احمد و لا ايه
ندا:اه
سها طب انا عايزاكى معاى فى مشوار بكره هعدى عليكى نخرج الساعة 5 ماشى
ندا:ماشى يلا سلام
سها:سلام
و انتهت المكالمة
احمد:خير فى حاجة
ندا:لا ابدا مفيش دى سها صحبتى
احمد:طب يا ندا انا هاحاول انسى الموضوع ده بس مش 3 سنتين ممكن بعد السنة دى و ما تكلميش دلوقتى الموضوع اتقفل ماشى
ندا:ايه ده بقى ان شاء الله انتى من اولها كده اولا مفيش موضوع يتقفل غير لما ادى رأيى فيه ماشى
احمد:ده اذا كان عندك رأى تانى غير اللى قولتيه
ندا: رأيى هو رأيى مش هيتغير يا احمد و ما ينفعش تتجاهل ارائى رأيى جزء منى يعنى لو ميهمكش يبقى انا مهماكش
احمدو وقف العربية:فى ايه يا ندا اللى انتى بتقوليه ده ايه اللى حصل عشان كل ده
ندا و هى متنرفزة و صوتها بدأ يعلى:فى انك رجعت فى كلامك انت قولت انك هتستنى و بناء عن كده وافقت اننا نكتب الكتاب دلوقتى متجيش بعد كده ترجع و تقول لا و فى الاخر تنهى الموضوع و تقولى مفيش نقاش اسلوب سى السيد فى قفل المواضيع على رأيك انت ما ينفعش معايا و لو كان ده اسلوبك يبقى مش هينفع نكمل مع بعض و الاحسن تط
فى اللحظة اللى كانت هتقول فيها تطلقنى احمد حط ايده على فمها باللغة العربية يعنى و قال
احمد:انا باحذرك و اياكى تقولى الكلمة دى تانى فاهمة و لا لا
ندا:لا مش فاهمة فعلا ما بقتش فاهمة اى حاجة من نصرفاتك المتغيرة معايا
احمد:تصرفات متغيرة ايه يا ندا اللى اتغير فى تصرفاتى شايفنى باعمل ايه
ندا:شايفاك بتتحول مش ده احمد اللى انا اعرفه احمد اللى كنت اعرفه ما كنش بيرجع فى كلامه
احمد:اللى كنتى تعرفيه ماشى يا انسة ندا
على فكرة انا عمرى ما رجعت فى كلامى و اذا كنت باقول كده فده لانى مش قادر اقعد من غيرك لانى بحبك يعنى كلامى ما رجعتش فيه و لا حاجة بس يظهر ان انا غلطت لما قولت كده لما كنت عايز نقرب لبعض اكتر و لقيتك عامله تقولى كلام ما كنتش احب انى اسمعه و اسلوب سى السيد ده مش اسلوبى يا انسة و اذا كنتى خلاص زهقتى منى فبراحتك لو عايزه ننفصل براحتك مش هاقدر اجبر واحدة انها تقعد معاى و هى مش شايفنى كويس و فاكرانى بارجع فى كلامى و سى السيد القرار ليكى
ندا:انا اسفة يا احمد انا اتنرفزت بس
احمد:اسفك مش هيفيد بعد اللى قولتيه لانى فعلا اضيقت انتى عندك استعداد من اول مشكلة تواجهك معايا انك تسيبنى انتى حتى ما حولتيش تغيرى الموقف خلاص يا ندا انا هأوصلك للبيت
و طول السكة و هما ساكتين و وصلوا البيت

من طرف تسبيح 26/10/09, 04:45 pm

الفصل العاشر

بعد ما ندا وصلت للبيت دخلت اوضتها بتعيد حساباتها و بتكلم مع نفسها الواد جننها يا عينى
ايه اللى بيحصل ده انا مش فاهمة حاجة ايه اللى خلانى اتنرفز كده و اقول اللى قولته ده ازاى اقوله ننفصل و انا ما اقدرش ابعد عنه و كمان هو زعل عشان قولتله كلام ......بس ما كنش قصدى طب اعمل ايه دلوقتى و بعدين هو افتكر انى فى اول محنة هسيبه طب اعمل ايه عشان افهمه لو ما اتصلش النهارده هابعتله رسالة بكره

ندا

اخس عليكى يا ندا ازاى تقولى الكلام ده ازاى مستعدة تسيبى فى اى لحظة و تمشى يا ترى هتعملى ايه لو قبلتنا مشكلة كبيرة هيكون تصرفك ايه ساعتها هتسبينى بردوه
يقول كده لنفسه و هو زعلان و مضايق

و فى اليوم التانى و احمد بردوه ما اتصلش للساعة 3 و ندا على نار مش متعودة على اللطعة دى اخر ما زهقت بعتت رسالة قالت فيها
(يا عم اسفين اقبل صلحنا بقى ده الطيب احسن و بلاش نخاصم بعضنا و بعدين ما كنش قصدى و الله لو موافق على الصلح مستنية تليفون للساعة 5 لو لا هازعل انا بقى)
لما الرسالة دى اتبعتت احمد كان مشغول فى الشغل و ما اخدش باله

الساعة 5 و احمد ما اتصلش و ندا على نار الباب رن ندا افتكرت احمد عامل مفاجئة و جاى بس ما طلعش احمد يا خسارة امال مين ؟
طلعت سها اللى جاية عشان تخرج هى و ندا بس ندا رفضت و سها قعدت تقنعها عشان تخرج وتفك عن نفسها و بعد مناقشة طويلة وافقت
خرجوا الساعة 6 طبعا ما الست ندا خدت وقت طويل فى الاقناع
فى الوقت ده احمد كان فى البيت هو و بيغير هدومه و بيطلع الموبايل شاف الرسالة و زعل جدا لما الوقت فات و فرح جدا عشان صالحته و اتصل بيها على البيت بس مامتها قالتله خرجت لما قالها فين قالتله مع سها
ساعتها اتجنن عشان ما قلتلوش ده بقى جوزها يعنى المفروض تستأذن منه الاول و اتنرفز اكتر لما ما قلتلوش لما كانت بتكلم سها امبارح
راح اتصل بيها على الموبايل و هى اول ما شافت رقمه طارت من الفرحة ما تعرفش ايه اللى مستنيها و على التليفون:
ندا:ازيك يا احمد زعلت لما ما اتصلتش
احمد:و انتى يهمك زعلى فى حاجة
ندا:طبعا يهمنى و لو ما كنش ما كنتش صالحتك
احمد:و ايه الفايدة لما تصالحنى و ترجعى تضايقنى
ندا:انا
احمد:ايوة انتى هو انا مش جوزك
ندا:اه
احمد:و الاسلام قالك انك ما تخرجيش غير باذن جوزك و انتى ما قولتليش انك خارجة مع سها لما تبقى تحترمى جوزك يا ندا ابقى اكلمك سلام
و قفل السكة
و نهى الموضوع بردوه من غير ما يسمع رأيها ندا كانت حاسة بالغلط و فى نفس الوقت متنرفزة
يلا سلام بقى اشوفكم فى حلقة جديدة

حكايات اتنين مخطوبين

حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين

رد: حكايات اتنين مخطوبين